Ávarp framkvæmdastjóra
Enn eitt árið er liðið og var árið 2025 bæði viðburðaríkt og krefjandi í starfsemi Brúar lífeyrissjóðs. Ytra umhverfi einkenndist af áframhaldandi óvissu á alþjóðamörkuðum, aukinni pólitískri spennu og óróa á fjármálamörkuðum í kjölfar tilkynninga um aukna álagningu innflutningstolla í Bandaríkjunum. Þrátt fyrir þessar aðstæður stóð sjóðurinn vel undir hlutverki sínu og rekstur ársins var í heildina góður. Raunávöxtun ársins nam 4,0% og nafnávöxtun 7,8%, sem telst ásættanleg niðurstaða í ljósi aðstæðna.
Raunávöxtun ársins 2025 nam 4,0% og nafnávöxtun 7,8%
Helstu lykiltölur og þróun í starfsemi
Hrein eign til greiðslu lífeyris nam 624,4 ma.kr. í árslok 2025, samanborið við 557,2 ma.kr. í lok árs 2024. Iðgjöld ársins námu 33,3 ma.kr., þar af 6,8 ma.kr. vegna aukaframlaga launagreiðenda. Að meðaltali greiddu 22.806 einstaklingar iðgjöld til sjóðsins á árinu. Lífeyrisgreiðslur námu 25,6 ma.kr. og fengu að meðaltali 18.095 einstaklingar greiddan lífeyri frá sjóðnum.
Sameining lífeyrissjóða
Mikilvægur áfangi í þróun sjóðsins var sameining Lífeyrissjóðs starfsmanna Akureyrarbæjar inn í Brú, sem tók gildi 1. janúar 2025 með stofnun nýrrar E deildar. Með sameiningunni hafa nú allir lífeyrissjóðir með ábyrgð sveitarfélaga verið sameinaðir inn í Brú. Líkt og í fyrri sameiningum var meginforsenda þessarar sameiningar að réttindi sjóðfélaga héldust óbreytt og bakábyrgð Akureyrarbæjar yrði áfram óskert. Frá sjónarhóli daglegs reksturs felur sameiningin í sér tækifæri til bættrar nýtingar mannauðs og aukinnar skilvirkni, án þess að dregið sé úr gæðum þjónustu eða réttindum sjóðfélaga.
setja kvót hér
Tryggingafræðileg staða
Ein af lykilforsendum stöðugrar starfsemi lífeyrissjóða er tryggingafræðilegt jafnvægi. Niðurstöður tryggingafræðilegrar úttektar fyrir árið 2025 sýna að staða A og V deilda er innan þeirra marka sem lög gera ráð fyrir. Tryggingafræðileg staða A deildar er jákvæð um 2,8% og staða V deildar er jákvæð um 2,5%. Aðrar deildir sjóðsins sem njóta bakábyrgðar sveitarfélaga eru undanþegnir kröfum um tryggingafræðilegt jafnvægi samkvæmt lögum um lífeyrissjóða.
Innleiðing á DORA regluverki
Á árinu 2025 hóf sjóðurinn markvissan undirbúning að innleiðingu DORA-regluverksins (Digital Operational Resilience Act), sem felur í sér samræmdar kröfur um stafrænt rekstrarþol fjármálafyrirtækja innan Evrópska efnahagssvæðisins. Regluverkið tekur til stjórnarhátta, áhættustýringar, viðbragða við rekstrartruflunum, upplýsingatæknilegs öryggis og samskipta við þjónustuaðila. Markmiðið er að styrkja viðnámsþol gegn tæknilegum og rekstrarlegum áföllum.
Undirbúningurinn hefur meðal annars beinst að greiningu núverandi ferla, kerfa og verklags með það að markmiði að meta stöðu sjóðsins gagnvart kröfum DORA, greina veikleika og forgangsraða aðgerðum. Jafnframt hefur verið lögð áhersla á að samræma vinnu við DORA við aðra þætti áhættustýringar og innra eftirlits sjóðsins, þannig að innleiðingin styðji við heildstæða nálgun á rekstrarlegu öryggi og seiglu.
CALA réttindakerfi
Stafræn vegferð sjóðsins hélt áfram á árinu og eitt af lykilverkefnum er þróun nýs réttindakerfis, Cala, í samstarfi við Devon ehf. Kerfið er ætlað að halda utan um iðgjöld, innheimtu, réttindaútreikninga sem og lífeyris- og skattaútreikninga. Hlutar lausnarinnar hafa þegar verið teknir í notkun, þar á meðal villuprófanir skilagreina, innheimta iðgjalda og framkvæmd og útborgun lífeyrisgreiðslna fyrir allar deildir sjóðsins.
Ávinningur þróunarinnar felst meðal annars í aukinni sjálfvirkni, minni handavinnu, lægri rekstraráhættu og bættum gagnagæðum, sem styður við betri þjónustu og hagkvæmni til lengri tíma.
Jafnframt hefur verið unnið að því að bæta aðgengi sjóðfélaga að upplýsingum með rafrænni birtingu bréfa og yfirlita. Gögn eru nú aðgengileg rafrænt á Ísland.is og á Mínum síðum á vef sjóðsins, sem styrkir upplifun sjóðfélaga og tryggir öruggari og skilvirkari miðlun upplýsinga.
Setja kvót hér
Jöfnunarframlag ríkisins
Á árinu komu fram áform stjórnvalda um að draga úr eða jafnvel afnema jöfnunarframlag ríkisins til lífeyrissjóða frá og með árinu 2026. Framlagið gegnir lykilhlutverki við að jafna stöðu sjóða með mismunandi örorkubyrði og stuðla að jafnræði sjóðfélaga milli sjóða. Þrátt fyrir háa örorkubyrði fékk Brú ekkert jöfnunarframlag á árinu 2025. Afstaða Brúar er skýr að ekki er unnt að gera slíkar breytingar nema fyrir liggi varanleg og kerfislega traust lausn á jöfnun örorkuáhættu. Án slíkrar lausnar skapast veruleg hætta á auknu ójafnræði og veikingu samtryggingarkerfisins.
Endurskoðun örorkulífeyriskerfisins
Á árinu 2025 hófst vinna við að skoða mögulegar grundvallarbreytingar á fyrirkomulagi örorkulífeyris. Í þeirri vinnu hefur m.a. verið til umfjöllunar hvort æskilegt sé að aðgreina örorkulífeyri frekar frá hefðbundinni samtryggingu lífeyrissjóða, meðal annars með stofnun sérstaks örorkubótasjóðs.
Hvaða breytingar sem kunna að verða á kerfinu þurfa réttindi þeirra sem þegar njóta örorkulífeyris að vera tryggð til lengri tíma, ásamt því að bæta fyrirsjáanleika og auka gagnsæi fyrir sjóðfélaga.
setja kvót hér
Flutningur og starfsumhverfi
Eitt af stærri verkefnum sjóðsins á árinu 2025 og það sem er af árinu 2026 er flutningur starfsstöðvar í Turninn í Kópavogi. Flutningurinn er mikilvægur áfangi í að bæta aðstöðu starfsfólks, efla samlegð og skapa betri forsendur fyrir áframhaldandi þróun á þjónustu við sjóðfélaga.
Setja kvót hér
Þakkir
Að lokum vil ég þakka starfsfólki sjóðsins fyrir góð störf, metnað og fagmennsku. Ég þakka einnig stjórn og endurskoðunarnefnd fyrir gott og uppbyggilegt samstarf sem byggir á trausti og sameiginlegri ábyrgð gagnvart sjóðfélögum.
Við höldum áfram inn í næsta ár með skýra forgangsröðun: Að standa vörð um réttindi sjóðfélaga með hagkvæmum rekstri, vandaðri áhættustýringu, ábyrgum fjárfestingum og þjónustu sem er bæði aðgengileg og góð.