Ávarp stjórnarformanns
Lífeyrissjóðir gegna lykilhlutverki í íslensku samfélagi. Þeir eru burðarás í velferðarkerfinu, tryggja afkomu tugþúsunda lífeyrisþega og eru jafnframt meðal stærstu fjárfesta landsins. Með þessu víðtæka hlutverki fylgir mikil ábyrgð gagnvart sjóðfélögum og samfélaginu í heild sem kallar á árangurs í fjárfestingum í samræmi við áhættuvilja stjórnar og ekki síst siðferðilegrar ábyrgðar í allri ákvarðanatöku.
setja quote hér
Afkoma og starfsemi ársins
Undanfarin ár hefur spenna í alþjóðakerfinu aukist verulega og engin skýr merki eru um að hún muni dvína á næstunni. Stríð og átök á svæðinu við botn Miðjarðarhafs, áframhaldandi ókyrrð á alþjóðavettvangi og aukin landfræðileg pólitísk sundrung hafa skapað óvissu sem getur haft áhrif á orkumarkaði, siglingaleiðir, alþjóðlegar viðskiptakeðjur og efnahagslegan stöðugleika.
Þá ríkti mikill óróleiki á fjármálamörkuðum eftir að stjórnvöld í Bandaríkjunum tilkynntu vorið 2025 um aukna álagningu á innflutningstollum. Slíkar aðgerðir raska alþjóðlegum virðiskeðjum, draga úr hagkvæmni í framleiðslu og geta haft neikvæð áhrif á hagvöxt og lífskjör á heimsvísu. Viðbrögð fjármálamarkaða endurspegluðu þessa óvissu.
Þrátt fyrir krefjandi ytra umhverfi var árið 2025 í heildina gott rekstrarár fyrir sjóðinn. Raunávöxtun nam 4%, sem telst vel ásættanleg miðað við aðstæður. Sjóðurinn er langtímafjárfestir og fjárfestir í fjölbreyttu eignasafni á mörkuðum víða um heim. Áhersla er lögð á faglega stýringu eigna, góða dreifingu milli eignaflokka og virka áhættustýringu.
Setja quote hér
Sameiningar og rekstrarlegur styrkur
Mikilvægur áfangi í þróun sjóðsins var sameining Lífeyrissjóðs starfsmanna Akureyrarbæjar (LSA) inn í Brú, sem tók gildi 1. janúar 2025 með stofnun nýrrar E deildar. Þar er haldið utan um rekstur, eignir, skuldir og skuldbindingar LSA. Meginforsenda sameiningarinnar var að áfallin réttindi og framtíðarréttindaávinnsla sjóðfélaga héldist óbreytt, ásamt óskertri bakábyrgð Akureyrarbæjar.
Sameiningin styrkir rekstrarlegan grunn sjóðsins, bætir nýtingu mannauðs og stuðlar að aukinni skilvirkni án þess að vegið sé að hagsmunum sjóðfélaga. Stjórn Brúar telur áfram mikilvægt að skoða slíka möguleika, enda geta sameiningar styrkt lífeyriskerfið í heild og stuðlað að jafnræði og hagkvæmni til lengri tíma.
Uppgjör skuldabréfa ÍL-sjóðs
Í október 2022 lýsti þáverandi fjármála- og efnahagsráðherra yfir hugsanlegum aðgerðum vegna stöðu ÍL‑sjóðs og óskaði eftir viðræðum við eigendur skuldabréfa hans um uppgjör. Frá þeim tíma hefur staðið yfir vinna við úrvinnslu eignasafns sjóðsins. Í október 2024 ákváðu fulltrúar 18 lífeyrissjóða og fjármála- og efnahagsráðherra að hefja formlegar viðræður um uppgjör skuldabréfa ÍL‑sjóðs, með það að markmiði að ná samkomulagi um uppgjör þeirra og skapa forsendur fyrir slitum sjóðsins.
Um miðjan mars 2025 náðist samkomulag í viðræðunefndinni um tillögu að uppgjöri HFF‑skuldabréfanna. Virði bréfanna í uppgjörinu var metið á 651 milljarð króna. Í tillögunni fólst m.a. að ríkissjóður afhenti eigendum skuldabréfanna safn nýrra ríkisskuldabréfa að andvirði 540 milljarða króna, auk annarra markaðsskuldabréfa og reiðufjár í íslenskum krónum og evrum. Tillagan var samþykkt af yfir 75% eigenda á fundi skuldabréfaeigenda 10. apríl 2025 og varð þar með bindandi.
Í kjölfarið var skilmálum skuldabréfanna breytt til að heimila uppgjör þeirra og voru bréfin innleyst 12. júní 2025. Við þann tíma voru skuldabréf ÍL‑sjóðs í eigu Brúar metin á 29.989 m.kr., en uppgjörsvirði þeirra nam 32.408 m.kr. Við uppgjörið voru því tekjufærðar 2.419 m.kr. hjá sjóðnum. Ný ríkisskuldabréf sem sjóðurinn fékk afhent við uppgjörið voru færð á markaðsvirði í eignasafni sjóðsins, líkt og áður gilti um HFF‑skuldabréfin.
Setja quote hér
Ábyrgur hluthafi
Sjóðurinn er virkur og ábyrgur hluthafi. Með virkri hluthafastefnu beitir sjóðurinn sér fyrir góðum stjórnarháttum, gagnsæi og ábyrgri stjórnun í þeim félögum sem hann fjárfestir í. Slík eftirfylgni er liður í því að vernda langtímahagsmuni sjóðfélaga og styðja við heilbrigt og sjálfbært atvinnulíf. Sjóðurinn mun í auknum mæli fylgja eigin gildum og sjónarmiðum í fjárfestingum og láta rödd sína heyrast í málefnum sem varða samfélagslega ábyrgð og stjórnarhætti fyrirtækja.
Áhættustýring
Áhættustefna og áhættuvilji sjóðsins voru yfirfarin og uppfærð á árinu 2025 og samþykkti stjórn uppfærða stefnu 17. febrúar 2026. Markmið stefnunnar er að tryggja skilvirkt og traust eftirlitskerfi með helstu áhættum í starfsemi sjóðsins, með kerfisbundinni greiningu, eftirfylgni og stýringu áhættu í samræmi við lög og reglugerðir um eftirlitskerfi með áhættu lífeyrissjóða. Áhættur ná bæði til eigna og skuldbindinga sjóðsins, sem og rekstrarlegra þátta.
Sjálfbærnistefna
Á árinu var samþykkt fyrsta sjálfbærnistefna sjóðsins. Markmið hennar er að skýra megináherslur sjóðsins á sviði sjálfbærni í allri starfsemi hans. Stefnan er leiðarljós fyrir ákvarðanatöku og framkvæmd en byggir á samspili við aðrar stefnur, reglur og innra verklag sjóðsins.
Lögð er áhersla á að sjálfbærni og öflugur rekstur haldist í hendur. Áhersla á umhverfismál, félagslega þætti og góða stjórnarhætti stuðlar að langtímaávinningi fyrir sjóðfélaga, starfsfólk og samfélagið í heild. Með skýrri stefnumörkun er dregið úr neikvæðum áhrifum á umhverfið, jafnframt því sem sköpuð eru tækifæri til verðmætasköpunar. Stefnan stuðlar þannig að auknum ávinningi fyrir sjóðfélaga, bættri starfsánægju og styrktri ímynd sjóðsins sem ábyrgs vinnustaðar og fjárfestis.
Dómar Hæstaréttar og lánastarfsemi
Á síðari hluta ársins kvað Hæstiréttur upp nokkra dóma sem varða skilmála fasteignalána með breytilegum vöxtum. Í kjölfar þess skapaðist veruleg óvissa á lánamarkaði. Viðbrögð sjóðsins voru m.a. að breyta framboði lána þannig að einungis voru boðin verðtryggð lán með föstum vöxtum. Þessar ákvarðanir voru teknar af varfærni og með hagsmuni sjóðfélaga að leiðarljósi.
Framtíðarsýn
Á árinu 2025 hófst umfangsmikil stefnumótunarvinna sjóðsins til ársins 2030. Þar er mótuð skýr framtíðarsýn og leiðarljós skilgreind í samræmi við hlutverk sjóðsins samkvæmt lögum og samþykktum. Áhersla er á framsýni, aukna skilvirkni, bætta þjónustu og nýtingu tækninýjunga, þar á meðal gervigreindar, til að styðja við ákvarðanatöku og þjónustu við sjóðfélaga.
Jafnframt eru kannaðir kostir við frekari sameiningar við aðra lífeyrissjóði, með það að markmiði að efla rekstrarlegan styrk, skapa hagræði og tryggja langtímahag sjóðfélaga. Í þessu samhengi er einnig horft til áframhaldandi þróunar skipulags og starfsumhverfis sjóðsins. Flutningur starfsstöðva Brúar í Turninn í Kópavogi er þar mikilvægur áfangi, sem mun bæta aðstöðu starfsfólks, efla samlegð innan sjóðsins og skapa enn betri forsendur til að veita vandaða þjónustu til framtíðar.
Þakkir
Að lokum vil ég þakka starfsfólki sjóðsins fyrir fagmennsku, metnað og ómetanlegt framlag í krefjandi og síbreytilegu starfsumhverfi. Þá vil ég jafnframt þakka stjórn og endurskoðunarnefnd fyrir gott og uppbyggilegt samstarf, sem byggir á trausti, sameiginlegri ábyrgð og einlægum vilja til að gæta hagsmuna sjóðfélaga til langs tíma.