Heims­mark­mið­in

Öll heimsmarkmiðin eru tengd starfsemi sjóðsins með einhverjum hætti en ákveðið var að hefja vegferðina á innleiðingu tveggja þeirra: markmiði 3 – heilsa og vellíðan og markmiði 13 – aðgerðir í loftslagsmálum.

Sjóðurinn fylgir stefnu um ábyrgar fjárfestingar þar sem leitast er eftir því að samþætta sjálfbærniviðmið og fjárfestingarákvarðanir eftir því sem kostur er. Horft er til UFS-þátta og heimsmarkmiða Sameinuðu þjóðanna og tekið tillit til þeirra að því marki sem rúmast innan hlutverks og fjárfestingarstefnu sjóðsins.

Heilbrigður vinnustaður er ekki aðeins gott markmið heldur er hann grundvöllur fyrir því að við getum sinnt hlutverki okkar vel. Við höfum lagt sérstaka áherslu á undirmarkmið 3.4 um geðheilbrigði og vellíðan.

Við höldum áfram að bjóða upp á sálfræðiþjónustu, heilsufarsmælingar og fræðslu um andlega og líkamlega heilsu. Þátttaka í þessum úrræðum hefur verið góð og bendir til þess að starfsfólk nýti sér þá möguleika sem í boði eru.

Sjóðurinn leggur ríka áherslu á heilsueflingu starfsfólks með styrkjum til heilsuræktar.

Loftslagsbreytingar eru ein af stærstu langtímaáhættunum sem sjóðfélagar okkar standa frammi fyrir sem og fjárfestingasafn okkar.

Losun tengd starfsemi sjóðsins skiptist í tvo meginflokka sem eru gjörólíkir að stærð:

Losun frá rekstri – þ.e. losun frá skrifstofurekstri, ferðalögum og orkunotkun – nam 1,2 tCO2í árið 2025. Reynt er að draga úr losun eins og kostur er.

Fjármögnuð losun – þ.e. losun sem hlutast til af fjárfestingum sjóðsins samkvæmt PCAF aðferðafræðinni – nam 272.596 tCO2í árið 2025, samanborið við 233.087 tCO2í árið 2024. Þetta er langstærsti hluti loftslagsáhrifa okkar og þar liggur raunverulegt tækifæri til að hafa áhrif. Við fylgjumst með þróun þessarar tölu og gerum grein fyrir henni í sjálfbærniuppgjörinu okkar.