UFS - þætt­ir

Uppgjörið er unnið af starfsfólki sjóðsins og byggir á upplýsingum sem safnað hefur verið yfir árið og er unnið í samræmi við leiðbeiningar Nasdaq og meginreglur Greenhouse Gas Protocol aðferðafræðinnar.

Sjálfbærniuppgjör 2024

Losun gróðurhúsalofttegunda er skipt í þrjú umföng. Umfang 1 er öll sú losun sem er skilgreind sem bein losun, þar með talin losun vegna framleiðslu á vörum eða vegna bruna á eldsneyti í bifreiðum. Umfang 2 nær yfir óbeina losun vegna hitaveitu og rafmagns. Umfang 3 inniheldur aðra óbeina losun sem fellur innan virðiskeðju sjóðsins, t.d. vegna ferða starfsfólks til og frá vinnu, viðskiptaferða og úrgangs.

Ferðir starfsfólks til og frá vinnu vega mest í kolefnisspori sjóðsins utan fjárfestinga eða um 73% af heildarlosun koltvísýringsígilda (CO2í). Sjóðurinn vill leggja sitt af mörkum til að draga úr þessari losun og hvetur því starfsfólk til að nýta heilsusamlega og vistvæna samgöngumáta. Meðal aðgerða til þess að ýta undir slíka þróun er samgöngustyrkur sem starfsfólki sjóðsins býðst að nýta sér.

Á árinu 2019 hafði sjóðurinn forgöngu um að setja upp hleðslustöð fyrir rafbíla við Sigtún 42 sem nýtist starfsfólki sjóðsins.

Á árinu 2024 var aðeins farin ein viðskiptaferðerlendis. Ráðstefnur, fundir og viðburðir eru nú oft haldnir með fjarfundarbúnaði. Sú breyting hefur þegar orðið til þess að viðskiptaferðum fækkar og búast má við að það sé varanleg þróun.

Rík áhersla er lögð á jafna stöðu og jafnan rétt kynjanna ásamt því að koma í veg fyrir mismunun á grundvelli kyns, kynþáttar eða af öðrum ástæðum.

Sjóðurinn er með jafnlaunavottun samkvæmt ÍST85-staðlinum. Vottunin nær til alls starfsfólks sjóðsins. Hún staðfestir að sjóðurinn hefur komið sér upp kerfi sem tryggir að málsmeðferð og ákvarðanir í launamálum séu kerfisbundnar, byggi á málefnalegum sjónarmiðum og feli ekki í sér kynbundna mismunun. Vottunin leiddi í ljós að það er enginn óútskýrður kynbundinn launamismunur hjá sjóðnum.

Sjóðurinn býður sjóðfélögum námskeið um starfslok til að undirbúa breytingarnar sem þá verða. Á námskeiðinu er farið yfir lífeyrisréttindi sjóðfélaga hjá sjóðnum og Tryggingastofnun ríkisins. Einnig býður sjóðurinn upp á vinnustaðakynningar þar sem þátttakendur fá yfirsýn yfir lífeyrismál.

Sjóðurinn hefur sett sér starfsreglur í samræmi við reglur um ársreikninga lífeyrissjóða. Við mótun stjórnarhátta hefur verið stuðst við leiðbeiningar um stjórnarhætti fyrirtækja sem Viðskiptaráð Íslands, Nasdaq Iceland og Samtök atvinnulífsins hafa gefið út. Sjóðurinn telur að góðir stjórnarhættir og skilvirk innri og ytri samskipti séu undirstaðan fyrir sjálfbærum og farsælum rekstri.

Sjóðurinn hefur sett sér stefnu um ábyrgar fjárfestingar sem setur siðferðisleg viðmið fyrir fjárfestingar sjóðsins. Lögð er áhersla á að fjárfestingar uppfylli kröfur um samfélagslega ábyrgð, góða stjórnarhætti og sjálfbærni. Ábyrgð í umhverfis- og samfélagsmálum þjónar hagsmunum bæði fjárfesta og samfélagsins.

Brú ávaxtar fjármuni sjóðfélaga með heildarhagsmuni þeirra að leiðarljósi og leggur áherslu á faglega nálgun við fjárfestingarákvarðanir sínar. Að auki lítur sjóðurinn til viðmiða Sameinuðu þjóðanna um ábyrgar fjárfestingar (UN Principles for Responsible Investment (PRI)).

Sjóðurinn er í samstarfi við eftirtalin samtök og fyrirtæki sem stuðla með einum eða öðrum hætti að ábyrgum og sjálfbærum fjárfestingum.

Sjálfbærni og ábyrgar fjárfestingar eru mikilvægir þættir til að tryggja langtíma rekstur og ávöxtun lífeyrissjóða. Ávinningurinn af því að samþætta UFS-þætti í fjárfestingarákvarðanir er verulegur þar sem þessi sjónarmið geta bætt ávöxtun en um leið dregið úr langtímaáhættu. Að auki geta lífeyrissjóðir, sem gæta fjáreigna heilu kynslóða, haft jákvæð áhrif á hegðun fyrirtækja og stuðlað að starfsháttum sem hafa góð áhrif á umhverfið, samfélagið og stjórnarhætti fyrirtækja. Nauðsynlegt er að sjálfbærnistefna sé í jafnvægi við skyldur sjóðsins til að vernda hagsmuni sjóðfélaga, tryggja varfærnar fjárfestingar og skila nauðsynlegri ávöxtun til framtíðar.

Brú lífeyrissjóður er langtímafjárfestir og lítur á eigendastefnu sem mikilvægan þátt í ábyrgri og faglegri stjórnun eigna í þágu sjóðfélaga. Hluthafastefna sjóðsins er hluti af fjárfestingastefnu sem er aðgengileg á heimasíðu sjóðsins. Þar er líka að finna upplýsingar um hvernig sjóðurinn nýtir atkvæði sín á hluthafafundum í skráðum félögum. Á árinu 2025 var unnið að eftirfylgni hluthafastefnu sjóðsins með samtali við félög, rýni á stjórnarháttum og þátttöku í hluthafafundum eftir því sem við átti.

Í aðdraganda aðalfunda ársins 2025 áttu starfsmenn sjóðsins fundi með tilnefningarnefndum skráðra félaga. Störf tilnefninganefnda eru mikilvæg og telur sjóðurinn að þær eigi að vera sjálfstæðar gagnvart stjórn og skipaðar af hluthöfum á hluthafafundi. Nauðsynlegt er að gagnsæi einkenni störf tilnefninganefnda og niðurstöður þeirra.

Auk þess funduðu starfsmenn Brúar með forstjórum og stjórnarmönnum skráðra félaga þar sem farið var yfir rekstur, stefnu og stjórnarhætti þeirra. Umræða á fundum og samskipti við félög sneri einkum að rekstri og stefnu félaga, stjórnarháttum og skipan stjórna (m.a. skipunartíma og samsetningu), starfskjaramálum og gagnsæi (þ.m.t. kaupaukakerfum), auk sjálfbærnimála og áherslna félaga á þeim vettvangi.

Eitt sem sjóðurinn lagði áherslu á á síðasta ári var að rýna starfskjarastefnur félaga. Því miður er það oft þannig að þær stefnur eru óljósar og óskýrar. Almennt vantar að fyrirtæki gefi út skýrslur um framkvæmd starfskjarastefnu. Þegar sambærilegar skýrslur hjá evrópskum skráðum félögum eru skoðaðar kemur í ljós að það er mikið rými til bóta hér á landi í þessum efum. Þar er skýlaus krafa um skýrleika og gagnsæi og að starfskjör séu ekki umfram það sem almennt getur talist vera eðlilegt á þeim markaði sem félögin starfa á. Í tveimur tilfellum á síðasta ári greiddi sjóðurinn atvæði gegn tillögum stjórnar á aðalfundum um starfskjarastefnur þar sem þær voru of óljósar að mati sjóðsins.

Markmið á þessu ári er að halda áfram samstarfi við tilnefninganefndir og taka þátt í að þróa störf nefndanna þannig að þær geti sem best þjónað hluthöfum. Einnig verður áframhaldandi áhersla lögð á starfskjaramál hjá skráðum félögum og að stuðla að meira gagnsæi um þau mál. Að lokum eru sjálfbærnimál okkur alltaf hugleikin og verða áfram ofarlega í huga í samskiptum við félög sem sjóðurinn fjárfestir í.